तनहुँको म्याग्दे गाउँपालिका–४ छिम्लेश्वारामा एकैदिन ४६८ किलो सयपत्री फूल बिक्री भएको छ। सोमबार चण्डेश्वरी फलफूल तथा तरकारी उत्पादक कृषक समूहले उक्त फूल बिक्री गरेको हो।
समूहका सचिव महेन्द्रराज रानाका अनुसार पोखराका व्यापारीलाई प्रति किलो तीन सय रुपैयाँका दरले फूल बिक्री गरिएको छ। उनले जानकारी दिए अनुसार दुई स्थानमा गरी छ रोपनी क्षेत्रफलमा पहिलोपटक सयपत्री फूल खेती गरिएको थियो। एक ठाउँबाट १६८ र अर्को ठाउँबाट ३६८ किलो फूल बिक्री भएको छ।
किसानहरू पहिलो वर्षमै फूलको राम्रो बजार पाएपछि उत्साहित छन्। अझै फूलको माग आइरहे पनि उपलब्ध फूल सकिएको र बजार पाउने चिन्ता हटेको सचिव रानाले बताए। फुटकर रूपमा माग आए पनि थप फूल दिन नसक्ने अवस्था रहेको उनले जानकारी दिए।
समूहकी अध्यक्ष जितमाया रानाले बजार नपाएर श्रम खेर जाने हो कि भन्ने चिन्ता रहे पनि बजार पाउँदा हौसला बढेको बताइन्। पहिलो वर्षमै फूलको बजार सुनिश्चित भएपछि आगामी वर्ष क्षेत्रफल विस्तार गर्ने योजना रहेको उनले थपिन्।
फूल फुल्दा कहाँ लैजाने भन्ने चिन्ता भए पनि राम्रो बजार पाउँदा किसानहरू खुसी भएका छन्। छ रोपनी भाडामा लिएर छ हजारभन्दा बढी सयपत्रीको बेर्ना रोपिएको थियो।
यसअघि काक्रा, घिरौला, बोडी, मास, करेला, खुर्सानीखेती गर्दै आएका किसानहरूले यस वर्ष सयपत्री फूलखेती शुरू गरेका हुन्।
