नेपाली राष्ट्रिय फुटबल टोली फिफा वरियतामा पछिल्ला ९ वर्षयताकै खराब प्रदर्शन गर्दै १८०औँ स्थानमा पुगेको छ। गत संस्करणमा १७६औँ स्थानमा रहेको नेपाल यसपटक ४ स्थान तल झरेको हो।
सन् २०१६ को डिसेम्बरपछि नेपालले यति कमजोर स्थान ओगटेको पहिलोपटक हो, जब टोली १८१औँ स्थानमा पुगेको थियो। पछिल्लो समय घरेलु तथा अन्तर्राष्ट्रिय फुटबलमा अपेक्षित सफलता हासिल गर्न नसक्दा नेपाली टोलीको अवस्था कमजोर देखिएको छ।
एएफसी एसियन कप छनोटका सबै चार खेलमा हार बेहोरेको नेपाल, फिफा वरियतामा झनै खस्किएको छ। यस्तै, बंगलादेशसँगको मैत्रीपूर्ण खेल गोलरहित बराबरीमा सकिएपछि पनि टोलीले अंक बटुल्न सकेन।
यसपटकको फिफा वरियतामा स्पेन शीर्ष स्थानमा छ भने अर्जेन्टिना दोस्रो र फ्रान्स तेस्रो स्थानमा छन्। दक्षिण एशियाली मुलुक भारत पनि २ स्थान तल झर्दै १३६औँ स्थानमा पुगेको छ।
