सङ्खुवासभा जिल्लाको मकालु गाउँपालिका–३ निवासी २९ वर्षीया सीता तामाङको स्वास्थ्य अवस्था सुत्केरी हुने क्रममा जटिल भएपछि हवाई उद्धार गरिएको छ। स्थानीय पाथिभरा स्वास्थ्य चौकीमा सुत्केरीका लागि पुगेकी तामाङको अवस्था बिग्रिएपछि आज बिहान नेपाली सेनाको हेलिकप्टरमार्फत् विराटनगरस्थित कोशी अस्पताल पुर्याइएको हो।
आइतबार साँझ स्वास्थ्य चौकी पुगेकी तामाङको स्वास्थ्य परीक्षणका क्रममा नवजात शिशुको अवस्था गम्भीर देखिएपछि स्वास्थ्यकर्मीले तत्काल उच्च उपचारका लागि सिफारिस गरेका थिए। प्रमुख जिल्ला अधिकारी सिर्जना थपलियाका अनुसार आज बिहान मकालु–३ सिम्मास्थित शोभा आधारभूत विद्यालयको मैदानबाट हेलिकप्टरमार्फत उद्धार गरिएको हो। थपलियाले समयमै हवाई उद्धार भएकाले तामाङको जीवन जोगिएको बताइन्। राष्ट्रपति हवाई उद्धार कार्यक्रम अन्तर्गत तामाङलाई विराटनगरको कोशी अस्पतालमा भर्ना गरिएको छ।
