काठमाडौं, जेठ २० । नेपाल कम्युनिष्ट पार्टी (एमाले)का अध्यक्ष केपी शर्मा ओलीले पार्टी संगठनलाई बलियो बनाउन नेता र कार्यकर्ताहरूलाई सक्रिय सहभागिताका साथ लाग्न आग्रह गरेका छन् ।
एमाले केन्द्रीय संगठन विभागद्वारा आयोजित ‘सदस्यता नवीकरण तथा विस्तार उत्प्रेरणा’ राष्ट्रिय कार्यशालाको उद्घाटनमा अध्यक्ष ओलीले पार्टी एकताको महत्व झल्काउँदै संगठनमा देखिएका चुनौतीहरूको बहादुरीका साथ सामना गर्न सबैलाई एकताबद्ध रुपमा जुट्न अपील गरे ।
उनले एमाले शान्ति, विकास, समृद्धि र लोकतन्त्र प्रति प्रतिवद्ध पार्टी भएको उल्लेख गर्दै कुनै कठिन परिस्थितिमा पनि हिम्मत नहार्न निर्देशन दिए । उनले प्रतिशोधको आधारमा काम नगर्न तथा डराउने या हतोत्साहित हुने प्रवृत्तिलाई छाड्न कार्यकर्तालाई निर्देशन दिए ।
कार्यक्रममार्फत ओलीले पार्टीभित्र रहेका भ्रम चिर्दै नयाँ उत्साह र दृढ विश्वासका साथ संगठन सुदृढ बनाउन सबैलाई कार्यक्षेत्रमा सक्रिय हुन प्रेरित गरे ।
यस राष्ट्रिय कार्यशालामा प्रदेश तथा जिल्ला इन्चार्ज, प्रदेश कमिटीका पदाधिकारी, कार्यालय सचिव, जिल्ला कमिटी अध्यक्ष, संगठन विभाग प्रमुख तथा जनसंगठन केन्द्रीय कमिटीका पदाधिकारी सहभागी भएका छन् ।