नेपालले आफ्ना सांस्कृतिक सम्पदाका प्रतीकसँगै न्यूयोर्कमा आयोजना भएको अन्तर्राष्ट्रिय बजार प्रदर्शनीमा सहभागिता जनाएको छ।
संयुक्त राष्ट्रसंघका लागि नेपाल स्थायी नियोगले संयुक्त राष्ट्रसंघ कर्मचारी जीवनसाथी क्लब (UNDSC) द्वारा आयोजना गरिएको वार्षिक संयुक्त राष्ट्र अन्तर्राष्ट्रिय बजारमा नेपालका समृद्ध सांस्कृतिक सम्पदा र मौलिक पहिचान दर्शाउने सामग्रीहरू प्रस्तुत गरेको हो। यस कार्यक्रमले सांस्कृतिक विविधता, मित्रता र मानव एकताका मूल्यलाई प्रवर्द्धन गर्ने लक्ष्य राखेको थियो।
नेपालले प्रदर्शनीमा परम्परागत कला, हस्तकला तथा विविध सांस्कृतिक सामग्रीमार्फत आफ्नो सिर्जनशीलता, सीप र राष्ट्रिय विशेषता उजागर गरेको थियो। नेपाली स्टलमा रहेका सामग्रीले आगन्तुकहरूको आकर्षण पाएको थियो।
विश्वका विभिन्न देशले आ–आफ्ना मौलिक उत्पादन, संस्कृति, परम्परा तथा परिकारको प्रदर्शनी गरेका थिए।
नियोगले यस्ता अन्तर्राष्ट्रिय कार्यक्रममा सहभागिताले सांस्कृतिक, मित्रता र सहानुभूतिका माध्यमबाट सबैलाई समेट्ने, एकताबद्ध र आपसी सम्बन्ध मजबुत बनाउने वातावरण सृजना हुने विश्वास व्यक्त गरेको छ।