काठमाडौंको नक्साल क्षेत्रबाट शंकास्पद क्रियाकलापमा संलग्न रहेको अभियोगमा दुई जना चिनियाँ नागरिकलाई प्रहरीले नियन्त्रणमा लिएको छ।
काठमाडौं उपत्यका अपराध अनुसन्धान कार्यालयका प्रवक्ता प्रहरी उपरीक्षक रामेश्वर कार्कीका अनुसार पक्राउ परेका व्यक्तिहरु वाङ वेन्ड (३३) र चेन शुआन्गुई (३२) हुन्।
यी चिनियाँ नागरिकले ‘भिजिट भिसा’ लिएर नेपाल आएपछि काठमाडौँ महानगरपालिका–१ नक्साल नारायणचौर क्षेत्रमा भिसाको उद्देश्य विपरीत शंकास्पद गतिविधिमा संलग्न भएको सूचना पाएपछि पक्राउ गरिएको हो।
प्रहरीले जानकारी दिएअनुसार उनीहरुले नक्सालको आरआर बिल्डिङमा एन्ट्रो टेक्नोलोजी नामक कार्यालय सञ्चालन गरी विदेशी युवती तथा मोडललाई लाइभ हब एपमार्फत अकाउन्ट खोली विदेशी र भारतीय नागरिकसँग संवाद गरी आर्थिक लाभ असुल्ने जस्ता अवैध कार्य गर्दै आएका थिए।
पक्राै परेका दुबै जनालाई अध्यागमन ऐनअनुसार थप अनुसन्धान तथा कारबाहीका लागि कालिकास्थानस्थित अध्यागमन विभागमा पठाइएको प्रवक्ता कार्कीले जानकारी दिए।