सामाजिक थ्रिलर फिल्म ‘अभिमन्यु : अध्याय १’ को प्रिमियर सोमबार लाबिम मलस्थित क्यूएफएक्स थिएटरमा सम्पन्न भएको छ। बिहीबारबाट सार्वजनिक प्रदर्शनमा आउने तयारीमा रहेको यो फिल्मको पहिलो पटक विशेष शो आयोजना गरिएको हो।
कार्यक्रममा फिल्मका निर्देशक, कलाकार तथा प्राविधिक टोलीको उपस्थितिले आकर्षण थपेको थियो। कलाकार कामेश्वर चौरासिया, सरिता गिरी, गौमाया गुरुङ, शिशिर बाङ्देल, लक्ष्मी बर्देवा लगायतले प्रिमियरमा सहभागिता जनाएका थिए।
सुशान्त गौतमको निर्देशनमा बनेको फिल्म १०८ मिनेटको छ।
‘सेभेन सिज सिनेमाज’को ब्यानरमा बनेको यो चलचित्रले दाइजो प्रथासम्बन्धी समाजको कठोर यथार्थ प्रस्तुत गर्छ। थ्रिलर विधि रुचाउने दर्शकका लागि उपयुक्त मानिएको यो फिल्मको ट्रेलरले धेरैको ध्यान तानेको छ। फिल्मको अग्रिम टिकट बिक्री खुला भइसकेको छ।