दक्षिणी लेबननमा सोमबार बेलुकी इजरायली सैनिक र हेजबुल्लाह लडाकुबीच भएको गोली हानाहानमा चार जना इजरायली सैनिकको ज्यान गएको छ भने दुई जना घाइते भएका छन्।
इजरायल रक्षा बल (आईडीएफ) ले मारिएका चार सैनिकमध्ये तीन जनाको नाम सार्वजनिक गरेको छ। टाइम्स अफ इजरायलका अनुसार मृतक सैनिकहरुमध्ये २२ वर्षीय क्याप्टेन नोआम माडमोनी सेडेरोटका, २१ वर्षीय स्टाफ सार्जेन्ट बेन कोहेन लेहाभिमका, र २१ वर्षीय स्टाफ सार्जेन्ट म्याक्सिम एन्टिस ब्याट यामका हुन्।
चौथो सैनिकको नाम आईडीएफले छिट्टै सार्वजनिक गर्ने जनाएको छ।
यी सबै सैनिक नाहल ब्रिगेडको रिकोनिसेन्स युनिटमा कार्यरत थिए।
घटनामा एक सैनिक गम्भीर घाइते भएका छन् भने अर्का रिजर्भिस्ट सैनिक सामान्य घाइते भएका छन्।
आईडीएफका अनुसार सोमबार साँझ ६:३० बजे दक्षिणी लेबननको पश्चिमी क्षेत्रमा अपरेसनको क्रममा नाहल रेकनिसेन्स युनिटका सैनिकले हेजबुल्लाह लडाकु समूह देखेपछि गोली हानाहान सुरु भएको हो।
हेजबुल्लाहका लडाकुहरूले इजरायली सैनिकमाथि मिसाइल आक्रमण पनि गरेका थिए, तर उक्त आक्रमणबाट अन्य सैनिकमा कुनै अतिरिक्त चोटपटक देखिएको छैन।