काठमाडौं । हमासलाई समर्थन गरेको आरोपमा अमेरिकामा एक भारतीय मूलका विद्यार्थी पक्राउ परेका छन् । अमेरिकाको एक अदालतले हिरासतमा रहेका विद्यार्थी बदर खान सुरीको सुपुर्दगी गर्न मानेको छैन । बुधबार भर्जिनियाको अलेक्जान्ड्रियाका जिल्ला न्यायाधीश प्याट्रिसिया गिल्सले बदर खान सुरीलाई भारत फिर्ता पठाउने ट्रम्प प्रशासनको प्रयासलाई रोकेका थिए । अर्को आदेश नभएसम्मका लागि उनको सुपुर्दगी स्थगित गरिएको हो ।
बदर खान सुरीकी पत्नी मफाज युसुफ सालेहको याचिकामा न्यायाधीशले यस्तो आदेश दिएका हुन् । मार्च १७ मा अमेरिकी गृह सुरक्षा विभागले प्यालेस्टिनी संगठन हमाससँग सम्बन्ध रहेको आरोपमा बदर खान सुरीलाई पक्राउ गरेको थियो । सुरी वासिङ्टन डीसीको जर्जटाउन विश्वविद्यालयका अनुसन्धानकर्ता हुन् । उनकी श्रीमती माफाज सालेह प्यालेस्टिनी मूलकी अमेरिकी पत्रकार हुन् । मफाज पनि धेरै वर्षदेखि भारतमा बस्दै आएकी थिइन् ।
भारतीय विदेश मन्त्रालयले यस विषयमा मिडिया रिपोर्टबाट मात्रै थाहा भएको र सुरी र उनको परिवारले सहयोगका लागि कुनै सम्पर्क नगरेको बताएको छ । बदर खानले २०११ मा गाजाको मानवीय यात्राको क्रममा आफ्नी पत्नी मफाज सालेहलाई भेटेका थिए । यात्रामा जामिया मिलिया इस्लामिया विश्वविद्यालयका धेरै विद्यार्थीसहित भारतका धेरै कामदार थिए, जो धेरै देश पार गरेर गाजा पुगेका थिए ।
यस भ्रमणको उद्देश्य प्यालेस्टिनी मुद्दाहरूको बारेमा चेतना जगाउनु थियो । त्यसबेला भारतीय अभिनेत्री स्वरा भास्कर पनि यसमा थिइन् । यसबाहेक भारतका अन्य धेरै मजदुरहरुको सहभागिता रहेको थियो । यस यात्राबाट फर्केपछि, बदर फेरि आफ्नो बुबासँग गाजा गए र माफाजसँग विवाह गरे। विवाहपछि बदर खान सुरी र सालेह २०१३ देखि भारतमा बस्दै आएका थिए र करिब डेढ–दुई वर्षअघि उनीहरू अमेरिका गएका थिए ।
बदर खान सुरीले दिल्लीको जामिया मिलिया इस्लामिया विश्वविद्यालयको नेल्सन मण्डेला सेन्टर फर पिस एन्ड कन्फ्लिक्ट रिजोलुसन सेन्टरबाट एमए गरेका छन् र सोही संस्थानबाट पीएचडी पनि गरेका छन् ।