उज्यालो नेपाल पार्टीका अध्यक्ष कुलमान घिसिङले राष्ट्रिय स्वतन्त्र पार्टीसँग गरिएको एकीकरण प्रक्रिया आफूका लागि निकै पीडादायी अनुभव भएको बताएका छन्।
मंगलबार आयोजित शुभकामना, चियापान तथा अन्तरक्रिया कार्यक्रममा घिसिङले हालै सम्पन्न एकीकरणमा भेटिएका भावनात्मक उतारचढावबारे चर्चा गरे।
घिसिङले उज्यालो नेपाल पार्टी घोषणा गरेको छोटो समयमै राष्ट्रिय स्वतन्त्र पार्टीसँग एकीकृत प्रक्रिया तिव्र गतिमा अघि बढेको स्मरण गर्दै, ‘यो आकस्मिक एकता थियो, प्रक्रिया निकै पीडादायी भयो, १२ दिनसम्म तनावमै रहेँ,’ बताए।
उनका अनुसार जेनजी आन्दोलनपछि नयाँ शक्ति निर्माणको लक्ष्यसहित उज्यालो नेपाल पार्टीको घोषणा भएको एक महिना पनि नबित्दै राष्ट्रिय स्वतन्त्र पार्टीसँग एकीकरणका लागि छलफल थालिएको थियो।
‘कार्यक्षेत्रको एकता भन्दा पूर्ण एकीकरण आवश्यक ठान्यौं, लामो छलफलपछि मात्र सहमति बनाउन सकियो,’ उनले बताए।
घिसिङले पार्टीले समानुपातिक मतसमेत त्याग्दै आपसी सहकार्य र एकता रोजेको उल्लेख गर्दै, ‘हामीले विशेष माग गरेनौं, प्रधानमन्त्री र सभापति पदको सहमति मात्र राख्यौं,’ स्पष्ट पारे।
फरक चरणमा सदस्यहरुसँग समन्वय गर्नु परेकाले एकीकरण कठिन भएको उल्लेख गर्दै घिसिङले, सामान्य सदस्यबाटै प्रक्रिया सम्पन्न गर्न सफल भएकोमा सन्तुष्टि व्यक्त गरे।
सङ्लन भएका दुई दलको एकीकरणका कारण आगामी चुनाव तथा राजनीतिक गतिविधिमा नयाँ समीकरण निर्माण हुने अपेक्षा गरिएको छ।