म्याग्दीको अन्नपूर्ण गाउँपालिकाले स्वास्थ्य सेवा पहुँच विस्तार गर्दै प्रत्येक टोलमा पुगेर सर्वसाधारणको स्वास्थ्य परीक्षण गर्ने कार्यक्रम सञ्चालन गरेको छ।
स्वास्थ्यचौकी तथा सामुदायिक स्वास्थ्य एकाइ नभएका टोलहरूमा स्वास्थ्यकर्मीहरू खटाइ रोग पहिचानका लागि परीक्षण गरिरहेका छन्। गाउँपालिकाको स्वास्थ्य शाखा प्रमुख समुन्द्र बरुवालले मासिक रूपमा स्वास्थ्यकर्मीहरू टोलमै पुगेर सुगर र प्रेसर जाँच गर्दै आएको जानकारी दिए।
बरुवालका अनुसार ज्येष्ठ नागरिक, बालबालिका तथा विपन्न समुदायलाई लक्षित गर्दै टोलमै स्वास्थ्य परीक्षणको व्यवस्था गरिएको हो। रोगको पहिचान र उपचारको पहुँच विस्तार गर्न यो कार्यक्रम प्रभावकारी भएको उनको भनाइ छ।
गत आर्थिक वर्षमा एक हजार दुई सय जनाले यो सेवाबाट लाभ उठाएको गाउँपालिकाले जनाएको छ। कार्यक्रम सफल भएपछि यस वर्ष पनि आवश्यक सामग्रीसहित स्वास्थ्यकर्मीहरू टोलटोलमा परिचालित गरिएको बरुवालले बताए।
स्वास्थ्यकर्मीहरूले औषधिसहित टोलमा पुगेर परामर्श र निशुल्क औषधि वितरण गर्छन्। परीक्षणमा समस्या देखिएमा अस्पतालमा उपचारका लागि सिफारिस गरिन्छ। साथै, उनीहरूले बालबालिकालाई खोप, गर्भवती र नवजात शिशुको तौलसमेत लिने गरेका छन्।
टोलमै सेवा उपलब्ध हुँदा समय बचत हुनुका साथै उपचार पहुँच सहज भएको अन्नपूर्ण–५, स्वाँतकी वीनाकुमारी तिलिजाले बताइन्। गाउँपालिकामा आठ स्वास्थ्यचौकी, छ सामुदायिक स्वास्थ्य एकाइ तथा एक आयुर्वेद स्वास्थ्य केन्द्र दानामा सञ्चालनमा छन्।
छरिएका बस्तीहरूमा स्वास्थ्य सेवा पुगाउन घण्टौँ हिँड्नुपर्ने भएकाले टोलमा स्वास्थ्यकर्मी परिचालन गरिएको गाउँपालिका अध्यक्ष भरतकुमार पुनले जानकारी दिए। निर्धारित समयमा गर्भ परीक्षण तथा संस्थागत प्रसूति गराउनेलाई घरमै पुगेर भाले उपहारसमेत दिने गरिएको छ।
अन्नपूर्ण गाउँपालिकामा घरमै प्रसूति हुनेको संख्या लगातार दोस्रो वर्ष शून्य रहेको छ। आर्थिक वर्ष २०८१–८२ मा ७९ र २०८०–८१ मा ९१ जनाले सुरक्षित प्रसूति सेवा लिएका छन्।