तीन दिनदेखि सम्पर्कविहीन रहेका रसुवा जिल्लाका दुई युवकको शव गोसाइँकुण्ड गाउँपालिका–६ स्थित सोले खोलामा फेला परेको छ। भदौ १५ गतेदेखि हराइरहेका २४ वर्षीय सुदीप घले र २३ वर्षीय दावा डेन्डुप तामाङ मोटरसाइकल दुर्घटनामा परेर ज्यान गएको हुन सक्ने प्रारम्भिक अनुमान गरिएको छ।
परिवारले खोजीका लागि जिल्ला प्रहरी कार्यालयमा निवेदन दिएपछि अनुसन्धान सुरु भएको थियो। प्रहरीले धुन्चेस्थित श्रीनाथ गणको सीसीटीभी फुटेजमा भदौ १५ गते राति करिब १० बजे घले र तामाङ मोटरसाइकलमा धुन्चेबाट ठाडेतर्फ जाँदै गरेको देखिएको पुष्टि गरेको छ।
त्यसपछि नेपाली सेना, नेपाल प्रहरी तथा सशस्त्र प्रहरीको संयुक्त टोलीले खोजी कार्य अघि बढाएको थियो। खोजीका क्रममा सोले खोलामा मोटरसाइकल खसेको अवस्थामा दुईजनाको शव भेटिएको सशस्त्र प्रहरीका सहप्रवक्ता डीएसपी शैलेन्द्र थापाले जानकारी दिए।
घटनास्थलको अवलोकन गर्दा मोटरसाइकल सडकबाट करिब २५० मिटर तल खसेको पाइएको छ। प्रारम्भिक अनुसन्धानमा सवारी दुर्घटनाकै कारण उनीहरूको मृत्यु भएको देखिएको छ। अहिले एक शव रोप रेस्क्यु विधिबाट निकाल्ने प्रयास भइरहेको छ भने अर्को शव पनि खोलामै देखिएको छ। घटनापछि गोसाइँकुण्ड क्षेत्र शोकमा डुबेको छ।