काठमाडौं । फिल्म ‘रावायण’ व्यापारिक रूपमा असफल भएसँगै अभिनेता पल शाहको करिअरमा संकटको संकेत देखिएको छ । आफू मुख्य कलाकार रहेको फिल्म असफल भएको तनावका बीच उनी सम्झौता भइसकेको फिल्मबाट निकालिएका छन् । फिल्म ‘कल्ली’को निर्माण पक्षले पलसँगको सम्झौता एकतर्फी रूपमा तोडेको हो ।
अभिनेत्री बेनिशा हमालको मुख्य भूमिका रहने फिल्मका लागि प्रमुख कलाकारकै रूपमा पलसँग निर्माण टिमले सम्झौता गरेको थियो । ‘रावायण’ पछि पलको अर्को प्रोजेक्टका रूपमा ‘कल्ली’ पाइपलाइनमा थियो ।
तर, अहिले एड्भान्स पनि माया मारेर निर्माण पक्षले पलसँगको सम्झौता तोडेको हो । फिल्मबाट निकालिएको कुरा निर्माताले सिधै पललाई नदिएर उनका सहयोगीमार्फत जानकारी गराएको बुझिएको छ । यसबारे पलले निर्मातालाई प्रतिक्रिया दिएका छैनन् ।
पलको ठाउँमा ‘कल्ली’मा सैगात मल्लको प्रवेश भएको छ । फिल्म ‘कल्ली’का निर्देशक लक्ष्मण सुनारले पललाई हटाएको पुष्टि गरे । यद्यपि, यसको कारणबारे भने उनले स्पष्ट बताएनन् ।
दक्षिण भारतीय सिनेमाको स्वाद दिन खोजिएको फिल्म ‘रावायण’ले दर्शकलाई तान्न सकेन । फिल्म प्रदर्शनमा आउनुअघि निर्मात्री एवम् अभिनेत्री पूजा शर्माले दिएका अभिव्यक्तिले पनि व्यापारमा प्रभाव पारेको अनुमान गरिएको छ । नाबालिक बलात्कार मुद्दामा जेल परेका पल उच्च अदालतबाट सफाइ पाएसँगै छुटेका थिए । यद्यपि, यो मुद्दा सर्वोच्च अदालतमा विचारधीन छ । यसबारे पलले भन्दा ज्यादा पूजाले चासो लिएर पीडितलाई गलत देखाउन बारम्बार अभिव्यक्ति दिएपछि चौतर्फी आलोचना भएको थियो ।