युक्रेनले रुसको कुर्स्क क्षेत्रमा दोस्रो रणनीतिक पुल ध्वस्त पारेको जानकारी गराएको छ । युक्रेनी सेनाले एउटा भिडियो सार्वजनिक गर्दै पुल ध्वस्त बनाएको जानकारी दिएको बीबीसीले जनाएको छ । सार्वजनिक भिडियोमा विस्फोटबाट एउटा पुल क्षतिग्रस्त भएको देखिन्छ ।
युक्रेनी सेनाले त्यो पुल ज्भानोईको सेयम नदीमा बनेको दाबी गरेको छ । यसअघि युक्रेनले सेयम नदीमा बनेको अर्को पुल पनि ध्वस्त बनाएको थियो । युक्रेनी राष्ट्रपति भ्लोदोमिर जेलेन्स्कीले रुसी आक्रमणलाई विफल पार्न बफर जोन निर्माण गर्ने क्रममा पुल ध्वस्त पारेको उल्लेख गर्नुभएको छ ।
सन् २०२२ मा रुसले युक्रेनमाथि सैन्य कारबाही शुरु गरेपछि रक्षात्मक रहेको युक्रेनले पछिल्लो दुई हप्तादेखि आक्रमक रुपमा प्रत्याक्रमण गरिरहेको छ । युक्रेनी सेनाले कुर्स्क क्षेत्रका थुप्रै बस्तीहरु कब्जामा लिएको छ । रुसले त्यो क्षेत्रका बासिन्दाको उद्धार गरिरहेको छ ।