आगामी फागुन २१ गते हुने प्रतिनिधिसभा निर्वाचनमा सर्लाही क्षेत्र नम्बर २ फेरि चर्चामा आएको छ, जहाँ दुई अनुभवी नेता महेन्द्र राय यादव र राजेन्द्र महतोबीच प्रतिष्पर्धा देखिएको छ।
राष्ट्रिय मुक्ति पार्टी (रामुपा) नेपालका अध्यक्ष राजेन्द्र महतो र नेपाली कम्युनिस्ट पार्टीका नेता महेन्द्र यादवबीच यसअघि पनि प्रतियोगिता भइसकेको छ, जसमा यादव विजयी भएका थिए।
महतोले यस क्षेत्रबाट पुनः उम्मेदवारी दिने निर्णय गर्नुका साथै सक्रिय रूपमा चुनावी अभियान समेत सञ्चालन गरिरहेका छन्।
२०७० सालको दोस्रो संविधानसभा चुनावमा दुबै उम्मेदवार सर्लाही–५ मा आमनेसामने भएका थिए, जहाँ यादवले २,७८४ मतको अग्रता हासिल गर्दै महतोलाई हराएका थिए। त्यसपछि, २०७४ मा महतो धनुषा–३ बाट निर्वाचित भए भने २०७९ मा उनी फेरि सर्लाही–२ मा यादवसँग भिडेका थिए, र यादवले यसपटक २,०११ मतले जितेका थिए।
२०७९ को चुनावमा सर्लाही–२ मा यादवले २३,५२९ मत ल्याएर विजय हात पारेका थिए भने महतो २१,५१८ मतमै सीमित भएका थिए। आगामी निर्वाचनमा पनि यी दुईवीच प्रतिस्पर्धाको सम्भावना बलियो बनेको छ।
यस सम्बन्धमा नेकपा नेता यादवले आफू सर्लाही–२ बाट उम्मेदवारी दिने चाहना रहेको भनेका छन्, यद्यपि अन्तिम निर्णय पार्टीकै हुने बताए।
त्यस्तै, पार्टीको निर्णय नआएसम्म यादवलाई सर्लाही–१ को सम्भावित उम्मेदवारका रूपमा पनि चर्चा गरिँदै आएको छ।